नवीन वर्षाच्या स्वागत प्रसंगी, आपण सर्वजन पाणी
टंचाई आणि दुष्काळाच्या संकटात जगत आहोत. या संकटकाळात शेतकरी आणि शेतीवर अवलंबून
असणार्‍या गावा-गावातील माणसांना जगण्यासाठी तातडीची मदत आणि दिलासा मिळण्याची
अत्यंतिक गरज आहे. आलेले संकट केवळ शेतकरी आणि शेतीवर जगणार्‍यासाठीच नाही, तर ते
आपणां सर्वावरचे संकट आहे. अशा प्रसंगी केवळ नवीन वर्षाच्या शुभेछा देऊन आलेल्या
संकटातून आपली सुटका हॊणार नाही ! परिस्थितीत बदल होण्यासाठी प्रत्येकांनी आपापल्या परिने आपल्या मदतीचा हात
गावातील लोकांपर्यंत पोहंचेल याची दक्षता घेतली तरच नवीन वर्षाच्या शुभेछा फलद्रुप
होतील. या कामात प्रत्येक व्यक्ती कांही ना कांही मदत करु शकतो, फक्त ईच्छाशक्ती
पाहिजे !
पैशाच्या किंवा मदतीच्या महापूरांने पाणी टंचाई आणि
दुष्काळ दूर होणार नाही. शासनाने कितीही दिले तरी आपणा सर्वांची गरज पूर्ण होणार
नाही, आणि निसर्गाकडून मिळालेले सर्वांना
सरणार नाही ! हे सत्य आता तरी लक्षात घेतले पाहिजे. पाणी मिळणे ! ही यच्चावत
प्राणीमात्राची मुलभूत गरज आहे. पाणी सर्वांपर्यंत पोहंचणेसाठी, पावसाचे पडणारे
पाणी, आधी ते शेतशिवारात आडवले पाहिजे आणि मूरवले पाहिजे. पाणी आडवणे आणि जिरवणे
ही जबाबदारी कांही केवळ गावातील लोकांची आणि शेतकर्‍यांची नाही, ही जबाबदारी
शासनाची, आणि समाजातील सर्व वर्गाची आहे, याची आम्ही वेळीच दखल घेतली नाही तर, सर्वचजण
पाणी संकटात अडकल्याशिवाय राहणार नाहीत, हे निश्चित !
म्हणून, आता नवीन वर्षाचा प्रारंभ गावावर केंद्रीत करुन
करु या ! याकरिता प्रत्येकाला आपापल्या मातृभूमीला प्राधान्य देता येईल, आपल्या
जवळच्या गावाला जाता येईल, किंवा आपापल्या आवडीप्रमाणे गावांची निवड करुन या कामी
हातभार लावता येईल. मात्र एकच प्रमुख बाब लक्षात ठेवली पाहिजे ती अशी की, आपल्या मदतीचा
प्रमुख हिस्सा हा “ पावसाचे पाणी आडविणे,
जमीनीत व जमीनीच्या वर पाण्याचा जास्तीत जास्त साठा करणे, यासाठी खर्ची पडेल “ असे उद्दीष्ठ ठेवले पाहिजे.
मी स्वत: या कामात व्यक्तिश: सक्रीयपणे सहभागी होत
आहे. आपण पण नवीन वर्षाच्या कृतियुक्त शुभेछात सहभागी व्हाल, अशी अपेक्षा आहे.
प्रारंभ झालेले सण २०१५ हे वर्ष आपणां सर्वांना “ पाण्याच्या मुबलकतेचे आणि अन्नधान्य समृध्दीकडे वाटचाल करणारे ठरो ! “ अशी मन:पूर्वक शुभेछा देतोत.
मच्छींद्र गोजमे,
अध्यक्ष
कार्यकर्ता संच
ग्रामीण विकास लोक संस्था , अहमदपूर (लातूर)
